Basler Fasnacht Trump, Infantino, Frühfranzösisch – Die besten Schnitzelbängg 2026

Für neui Zeen wirsch z’Ungarn fündig, Auge lasere, kurz und bündig.
Z’Thailand muesch nid lang studiere, dert giz Brüscht zum implantiere.
Für dichters Hoor gosch in Türkei, implantiert gsehts uss wie ney.
In d USA dert anefarsch, für dr allergröschti Arsch.

(MS Fischbrötli)

Bild: KEYSTONE

Kiirzlig hann i e Dräumli kaa,
I see dr Trump mit e me Lindhaas voornedraa,
Die sinn sich seer äänlig, i dängg s jeedes mool,
roti Schleife – blond und inne Hool.

(Gnallfrosch)

Bild: KEYSTONE

Dr Trump baut s’ Wysse Huus grad um-är duets eso begründe
är bruuchi vyyl mehr Platz für alli syny neie Fründe
e riisiggrosse Ballsaal gits - är gratzt drby sy Ranze
Nur so kaa d’Wält viel besser no noch synn’re Pfiffe tanze

(Staibuggler)

Bild: KEYSTONE

Do letschti chunnt e guete Chund zu mir i d’Bäckerei
Dr Trump het gseit, du bschissisch mi, das isch e Sauerei
I chauf Brot und du nüt bi mir, drum isch jetz eifach gnue
Mi Ussehandelsdefizit loht das nümmi zue

(Lumpesammler)

Bild: KEYSTONE

Gross, behoort und eenter mollig, dr neii Aff im Zolli.
Nimmersatt und aagriffswietig ziet äär scho sy Zoll yy.
Heggscht botänt und bsunders spitz, wenn d Wyybli jinger sinn.
Schaad nuur kunnt is fir e Pointe doo kai Mensch in Sinn

(Diigermugge)

Bild: KEYSTONE

Im Zolli-Sprächzimmer für Tier mit ‘me Lyyde
Wott s Zeebra bim Herr Doggter e Depression lo vermyyde
«Myni Straife, s macht mr z schaffe,
Dien alli ganz gnau aagaffe
Und die dängge doch am Änd,
Ych syg e Epstein-Dokumänt!»

(Schunggebegräbnis)

Bild: KEYSTONE

Schwarz Schwarz Schwarz Schwarz Naiaaberau!
Schwarz Schwarz Schwarz Schwarz Was? Dä au!
Schwarz Schwarz Leerschlaag Schwarz Schwarz ui
Schwarz Schwarz unterstriche Pfui
So jetz kennet iir alli Faggte
iber die neyschte Epstein-Aggte.

(Wanderratte)

Bild: KEYSTONE

S wälzt sich dr Chef vo Greenland schlooflos znacht im Bett
Uss Angscht as en orangsches Monschter s Land uffrässe wett
Denn goot em s Liecht uf: E neyye Name wäär dr Hit
«Epstein-Land» - denn bhauptet dr Trump uns gitts gaar nid

(Nachtkerze)

Bild: KEYSTONE

Bi de Saudis in dr Wieschti hesch die kriminelle Ryyche
In Russland e Diktaator, dää goot au üüber Lyyche
E Grüüsel in de USA, älter als e Dino
Und zämme sins die beschte Fründ vom Gianni Infantino

(Spootschicht)

Bild: KEYSTONE

Won y letschti bi go Käffele im Sprüngli
bschtell y eins vo dääne feyne Schoggizüngli
Ha s in e Fuudiweggli gschteggt - groosses Kino
Daas hett usgsee, Sii, wie Trump und Infantino

(Rollaator Röösli)

Bild: KEYSTONE

My Bueb, dr Fritzli, sait mer: „Mer passe SOO guet zämme,
waisch, wägem Sagggäld, main y,mer wänn is doch nid schämme?
Wenn d’mer e Zwanzger mee gisch, denn kunsch – ins Baredyys!
Denn griegsch sogar vo mir no Dr «Fritzli» – Friidens-Bryys»!

(Hansli Bargäld)

Bild: KEYSTONE

Duesch uff die grieni Ample schile,
Sehsch Fraueli, wo Fuessball spiele.
Jetzt miesst me’s unbedingt aasträäbe,
Der Infantino no ufs Rotliecht z’klääbe.

(Rätschbääse)

Bild: KEYSTONE

D Putzfrau im wysse Huus duet motze
ständig Bsuech uss dr Schwiz, sisch zem kotze
vor allem dä Infantino macht Drägg
däm syni Schliimspur griegi fascht nit wäg

(Dipflischysser)

Bild: KEYSTONE

Wenn s Fäärnseh d Bilder vo de Schnitzelbängg verbräitet
und die Halbierig kunnt, denn simmer vorberäitet.
– – –
– – –

(Singvogel)

Bild: KEYSTONE

Bitz weeniger steggt dinn zum glyche Bryys – au in dr Schwyz
Uf ere Toblerone – sait me – fäält ab jetz e Spitz.
Gisch aifach nit der Düürig tschuld am Bschiss in däm Regal!
Nai, unsri Bärge mööge nümm und stürze sich ins Daal.

(Schlachtbangg)

Bild: KEYSTONE

Dää Zoll-Deal mit den Amis isch doch fuul und obermyys:
Mir importiere Bison-Fleisch und Chlorhuen tonnewyys,
Vom Huen griegsch Hienerauge und vom Flaisch griegsch Bison-Waan,
Kai Wunder wäggslet d Uni-Mensa schleinigscht uff vegaan.

(PereFyss)

Bild: IMAGO

Dr Beat Jans dä het mir gseit, s isch unerträäglig
Är sprützt die Abnähmsprützi circa 12 mol dääglig
Är sig zwar sportlich, fit und schlank, das isch scho wohr
Är brucht die Sprützi jo au nur für s einte Ohr!

(Frau Fasnacht)

Bild: KEYSTONE

Was fange au d Chinese mit däm Ueli Murer aa?
Dert trifft är jo am liebste numme Pest und Cholera
Doo het är sich politisch gsee in epis bleeds verstriggd
Drum hän s en denn vo Temu wieder gratis Heime gschiggd.

(Frau Länzli)

Bild: KEYSTONE

E Zäämillione-Schwyz und denn isch Schluss, kain darf me koo!
Erscht wenn ain wider uusegoot, darsch öbber yyneloo.
Stell dr vor, dir Buschiquote stygt mol wider aa,
Denn waarte die im Buuch, bis ain dr Löffel abgää kaa.

(Schlachtbangg)

Bild: KEYSTONE

«Salut chérie, tu veux amour?» schreit äin und foot aa lache
«Pourquoi tu m’as regardé?» und zägg! Griegsch äini bache
Dr näggschti klaut dir s Bortmennee wennd uff dr Wiise döösisch
Statt indr Schuel leersch z Baasel in dr Baadi frie Franzöösisch

(Spootschicht)

Bild: KEYSTONE

Dr Stand vom Friehfranzösisch, dää isch als no grytisch.
Drum diskutiert me s jeedes Joor wiider politisch.
Es wär doch gscheyt, wenn miir dört sproochlig besser wäre
zum de Franzoose d Baadi-Reegle rächt erglääre.

(D‘Schnittstell)

Bild: KEYSTONE

E mänteno scher Dömoisell, Medam und Messiöö
Schö vous schant ö Schnitzelbongg, pöteter sogar dö
Ils ont a eu, elles, elles a äh öh… merde, dasch e Shit
Trotz all däm Frieh-Französisch längts für e Pointe nit

(Lumpesammler)

Bild: KEYSTONE

Dr Ueli Murer sait miir ganz disgreet, das isch doch biireweich
Das Friefranzösisch isch e Seich
Das duet mi an dr Schwyz halt steere
Die sotte doch kyneesisch leere

(Gnallfrosch)

Bild: KEYSTONE

Während dr Frauefuessball EM meint mi Maa
Dass me als Frau jo gar nit richtig schutte ka
Är seit «im Sport sin mir euch Fraue überlääge»
Und mit sim dicke Ranze stolz uffs Sofa glääge.

(Frau Fasnacht)

Bild: KEYSTONE

Jeedes Wuchenänd, ych ha’s langsaam satt
Schwäärmt myyn vom Marco Odermatt
«So athleetisch und männlig» duet sy lalle
Dä Köörper wuurd ere schuurig gfalle
Nääbe däm Adonis, das saag ych iihne
Gseehn ych uss wie em Marco sy Wöschmaschiine

(Giftspritzi)

Bild: KEYSTONE

Dr FCB, uns hetts fascht gschellt
hett Mittelstürmer online bschtellt
was er hätt beachte selle
Qualität duesch nit bi TEMU bschtelle

(Dipflischysser)

Bild: KEYSTONE

Dr Lichtsteiner het jetzt d Buebe vom FCB übernoo.
Noch siibe Möönet ummegumpe isch dr Magnin nümme doo.
Me hät doch in dr Region öbber Bessers chönne finde.
Zum Byspiil s Fränzi Buser vom Chindsgi Gälterchinde.

(Heiri)

Bild: KEYSTONE

Im Altershäim Gottsaggerbligg im Joor Zwäidausigachtzig
Frogt sich d Schweschter Helena was das denn für e Krach syg
Äin syg Kopf voraa vom Kaschte gumpt, was isch passiert?
Dr Simon Amman ischs wo für Olympia trainiert.

(Spootschicht)

Bild: KEYSTONE