Basler Fasnacht ist vorbei Ai du scheene Schnitzel-Sport-Bangg!

Roger Federers Ehrendoktortitel, der gewalttätige Sion-Präsident, die neue Führung beim FC St.Gallen und natürlich viel FCB – das waren die häufigsten sportlichen Themen bei den Schnitzelbängg an der Basler Fasnacht 2018. Wir haben die besten, bissigsten und unflätigsten für Sie zusammengetragen:

Doggter FMH

Si, in mym Wartzimmer hets – gottverglemmi
sit Wuchen e richtigi Fraueschwemmi!
Au d Gundula isch am hienere und duet saudumm
Jä, dr Doggter Federer macht bi mir sy Praktikum!

Singvogel

Sytdäm der Federer als Doggder isch veräidiget,
syg der Karli Odermatt e bitz beläidiget.
Und au der Hakan Yakin, dä verstohts nur schwär.
Wenn ain im Döggderle Erfahrig häig, denn äär!

Fäärimaa

Sie wänn in dr Formel I, soo höört me brichte
uff dr Bääsewaage ganz verzichte
sie hänn jetz gmerggt, me kaa sich s spaare
will jo z hinderscht die baide Sauber fahre

Rollator Röösli

Füüdleblutt hogg ich alti Friggadelle
noch em Dusche uff my iPhone, ooni z welle
Mit dr Gsichtserkennig hetts Verwirrig gää:
Bim Uffstoo sait das Gräät: «Bonjour Heer Constantää»

D Rätschbääse

D Bress maint dr Boris Becker, dä seig doch vellig blangg.
Das Grücht, das macht dr Bobele wiirgglig dotaal grangg.
Er haig non e baar Millioone y sym Kuchischrangg.
Derzue e digg gfüllts Konto uff dr Saamebangg!

Brunzguttere

Jetz soll dr Hüppi schiins im Oschte d Wändi bringe
do mien die Wüürscht bim Schutte um ihr Läãbe springe!
Will' s isch eso, für jeede Matsch, wo die verliere
duet är zur Stroof e Stund lang s Training moderiere.

Pierrot

Fuessball isch e Massesportl
me schuttet praktisch an jedem Ort,
doch wenn denn alli z Russland gjngge,
mien Tschingge in de Fingge vo dehaim us wingge.

Die Unerheerte

Dr Frei dä kunnt dr Steffen goot dr Stocker kunnt
Au dr Akanji goot dr FCB dryybts bunt
S kunnt als Ersatz dr Carlo Janka fir vyyl Gäld
Jä dää isch Spitzeklass im hintre Mittelfäld

Wiggelfisch

D UNESCO hätt nääb dr Fasnacht - so hai mir vernoo,
fascht no e Bärner Bruuch in Eere uffgnoo.
Firs alljöörliche Ritual mit vollem Yysatz,
vo YB - fir dr eewig zwaiti Blatz!

Mac Väärs

YB isch dr Wintermaischter und mir finde s isch OK
Fir die Laischtig ka-me deene dä scheen Titel aimool gee
S Gääl-Schwarz isch au wirgglig rassig d YB-Lyybli sin dr Hit
Und zem Gligg isch ganz vyyl Gääl dinn sunscht seesch d Spiiler nämlig nit.

S Schunggebegräbnis

Dr Steffen zieht wyter, dr Streller nimmt s logger
und bschtellt sich z Berlin e fascht unbruuchte Stogger,
by Zalando, dasch s Digge kasch Niete zruggschigge,
also Pipi, jetz bigoscht, due dä Brigger gly uf d Boscht!

Banggrott

Hesch scho ne moll dää Burgener gsee?
Dää syyg schyynts Breesidänt vom FCB.
Im Musical-Theater ha en gsee,
als Phantom of the FCB!

Wanderratte

Wier hey nie wie d Mültini afa rammlu,
und sii wäärli öi nit ga Parüüla psammlu.
Aber di Goggowärgjini brüüchund Sunnuschii,
und där Güegu a ner Welbi mottut schii.
Lieber hämmer e Trainer wo me nit verstoot,
als e Presidänt wo d' Lyt abschloot.