An der Basler Fasnacht wird auch der FCB nicht verschont und kriegt verbal ordentlich auf den Deckel – aber alles im grünen Bereich und mit viel Wortwitz. Eine Auswahl der besten Schnitzelbängg aus der Welt des Sports.
▶ Giftspritzi
Letscht Friehlig – y ha gmaint, ych spinn
Hogge im Zug fascht nur Kardinääl und Pfaffe dinn
Die hänn verzellt, si kääme vo nooch und färn
Und pilgere mit Glaubensgnosse bis uff Bärn
Es syg halt scho e bitzeli d'Luscht wo se alli wuurd styyre
Wenn e huffe «Young Boys» e grossi Party fyyre
▶ Bäffzgi
Wo dr Xhaka mit däm Zaiche ibers Spiilfäld schryttet
hetts gheisse, dass das gar nit e Doppeladler bedyttet
är hett nur em Mannchafts-Koch e Zaiche gmacht
är welli nur zwai Mischtgratzerli zem Znacht.
▶ Nachtschwärmer
In Ziiri, s’isch e Sensation
Git’s doch no e Fuessballstadion
Ziiri passt sich Baasel aa, wo e super Stadion het
Baasel passt sich Ziiri aa, schuttet schlächt wie dr FCZ
▶ Schlyychwärbig
Leesli, kauffet Leesli, riefts bim Daame-FCB.
Statt Cüpli in de Gleesli, het s Sandwich z frässe gee.
Leesli, kauffet Leesli, dr Schnäller isch dr Gschwinder
d Niete schteen scho uff em Fäld und dr Hauptbryys isch e Inder.
▶ Babberlababb
Dr Sohn vom Marco Streller isch e arme Wicht
Het wäg de Masere vyyl roti Pünggt im Gsicht
Dr Strelli seit ganz greizt
«Mi Sohn, y seh du lyydisch»
Jä aber Gopf, uff so viel Pünggt do bin y nyydisch!»
▶ Wyybuure
Wiider zrugg live us em Stadioon, der FCB gryfft aa.
Der Widmer spiilt e hoche Ball, der Zuffi nimmt en aa.
Är laitet wyyter zem Karambal Karan Sooar
Tarmaans Mahila Shud Kalal Bundi
Baladikumaran Chandra Markandar Karmaril
Mahatma Paravan Taran Tori Paadandara
Chutny Mandir Laritaral Mahai.
Do sait der Abwart: Kumm jetz klemmed ab, d Lyt sinn scho lang dehai!
▶ Schlyychwärbig
An dr Formel-E in Ziiri dien uns d Piloote laid!
Mit Raasemaaier Renne faare, macht bestimmt kai Fraid.
Und s Schlimmschti bi däm Hottere, fir d Faarer, s isch zem Gruuse:
egaal wie schnäll ass d faare duesch, kunnsch nie us Ziiri uuse!
▶ Schlyychwärbig
Yylauff, Yyglemmts, Yydritt, Yystoo und Yybrächer,
E-Sport, E-Bike, E-Book pfyyft s nei vo allne Dächer!
Nur ai «Yy» isch drnääbe und macht is wiirgglig wee:
Es kunnt us Bäärn, goot uff e Sagg und het am Änd e B!
▶ Dipflischysser
D Fuessballer hänn so BH montiert
jede glaine Schritt wird registriert
bim FCB hätt me sichs lieber gschänggt
well e reine Bewegigsmälder länggt
▶ Nachtschwärmer
Dr FCB het jubiliert
D’Männer händ ooni Fraue gfiirt
Die händ miesse Löösli verkaufe, so öbbis darf nid passiere
Hätte mir öbbis z’saage gha, mir hätte si lo serviere
▶ Babberlababb
An dr WM kriege d Schwoobe eins an d Bagge
Nach dreyne Mätsch gsehsch sii im Hotel d Koffer pagge
Dr Müller schiilt zum Hotelpool und seit fruschtriert
«Drbyy han ich für morn scho d Liegstiehl reserviert»
▶ Wanderratte
Dass mär am Ballon d’Or, i bi jetzt no gschogt
d Gwinnärä nachemne Fuditänzli frogt
das wurd sich ds Basel kain getraue
mir schätze und verehre d'Fraue
die dörfe do sogar frei umelaufe
und für ä Sandwich Lösli verkaufe
▶ Schynheilig
Dass dä Dütschä
die Fuessball-WM verreckt
(lange Pause)
het der Jogi jo scho syt längerem gschmeckt
▶ Penetrante
Für dä Embolo isch das ä hartä Schlag
au für ihn sig's WM-Aus än schwarzä Tag
Er hätti gärn äs Goal gmacht, hät au gwysst wos stoht
nur haig är nid gwüsst wie dä Doppeladler goht
